கவிதைகள்
Trending

ருசிகரமான சுனை நீ

தமிழ் உதயா

விக்டோரியாவை வட்டமிடுகின்றன
பயணக்கனவின் ஈசல்கள்
தோற்றுப்போகாத காலமொன்றின்
சுமாரான முகில்மழையில்
ஜி எம் ரி தன்னை நீட்டுகிறது வெதுவெதுப்பான தேனீர் மிடறின்
உதடு குவிப்பில்
களையப்பட்டது விவாதம்
நாளிதழ்களில் துண்டங்களாயிருந்த சொல்லொன்றில்
ருசிகரமாகச் சொல்லாகிக் கொண்டிருந்தாய்
வீசும் மொழியில் ஈரம் படர
வழிப்பயமின்றி கடந்து கொண்டிருந்தது பெயர் தெரியாத ஒரு பகல்
உருகி உருகி ஓயும் மெழுகுவர்த்தியாய் இறுதியில்
சிலுவைப்பாதை ஒன்றை
உலர்த்தி நிறுவினேன்
தேடியெடுத்த நாட்குறிப்பில்
மலர்ந்த முகத்துடன்
மழையை ரசித்தவாறு உட்கார்ந்திருந்தாய்
நகரும் பஸ்ஸின் முன்னிருக்கையில்
மெல்லிய ரகசியமொன்றில்
கனிந்திருந்தது அச்சொல்
நீயேன் கலங்கினாய் கார்மேகா

000

அல்லி முளைத்திருக்கும் பாறை நீ
வழுவழுப்பான தடம் தெரியாது
வனாந்தரமெங்கும்
அலைய வேண்டாமென
இந்த மலைக்குள் ஓர் அம்புக்குறியிட்டு
வீசும் வாசத்தோடு காத்திருக்கிறேன்
கிழிசல்கள் மேய
சர்ப்ப நாக்குகளோடு
மஞ்சள் மஞ்சளாய் அசைகையில்
மலர்த்திக்கொண்டே இருக்கும் மூக்குத்திப்பூண்டுகளை
களைந்து வாழ்வது எப்படிச்சொல்
திகட்டச் செரிக்காத வார்த்தைகளின்
பிரத்தியேகமான மொழியின் களையில்
பசுஞ்சாணி பூமி பரப்ப
தரையோடு தரையாக
ஊர்ந்து செல்லும் இக்கணங்களை
நிலா வெளிச்சத்திலேனும்
பார்க்கவில்லையா கார்மேகா

000

மிகக் கிறுக்குத்தனமான காலையில்
இன்னும் தூங்கிக் கொண்டிருந்த தவிட்டுக்குருவியின்
நீலம் அப்பிய இறகில்
உபரி வாசம்
சற்று உப்பியபடி இருக்கும்
குருதித்தாங்கியை
ஒரே ராத்திரியில் பூசிய பிரியதைலத்தில்
சேலைத்தலைப்பில்
கொய்து வைத்திருக்கிறேன்
முதல் கீற்றில் தெளியும்
விம்பத்தின் நெற்றி நடுவே
கருவுற்றிருக்கும்
செவ்விதழின் ஒற்றைக்காம்பில்
வெள்ளித்தளிராய்
துளிர்த்திருப்பது நீயா கார்மேகா

000

மனக்கூடலில் பிசைவு இல்லை
என்றாலும் நசிகிறது உயிர்
அதன் உச்சியில் இறங்கி
படிக்கட்டில் சறுக்கி விளையாடுகிறாய்
எதுவுமறியா நீலவிளிம்புகள்
மூர்ச்சையிழக்கின்றன
முளைத்திருக்கும் குறுக்குவழியில்
சொல் நிகழ்த்தாப் பதட்டம் யுகங்களாய் பிரிகிறது
கருவேலங்காடாயிருந்த சம்பவங்களை வாலிபமண் துளைத்துக்கொண்டிருக்கிறது
சதுக்கமாய் இருந்தால் என்ன
குதிரைகளின் குளம்படிகளாய்
தடதடக்கும் நினைவுகளை
லாடம் கட்டி இழுக்கிறாய்
கணுக்கால் நனைய
மண்ணைத்தோண்டி கடல் செய்கிறேன்
கடைசியில் எஞ்சியிருப்பது
முற்றத்தில் பெய்த மழையென
நதியின் சமீபம் அல்லவா கார்மேகா.

குறிச்சொற்கள்
மேலும் வாசிக்க

தொடர்புடைய பதிவுகள்

Leave a Reply

Your email address will not be published. Required fields are marked *

Back to top button
Close