சிறுகதைகள்
Trending

அக்றிணை வாசங்கள்

காலத்துகள்

“matings in which men copulate with men, and women with women,
watermelons, bananas, cantaloupes, and
every imaginable disgusting thing if it makes them agreeable to the
pursuit of pleasure”

கலைத்துப் போடப்பட்டிருந்த புத்தகங்களுக்குள் மீண்டும் தேடினான்.

எப்போதும் உபயோகிக்கும் பால் பாயிண்ட் பேனாவை காணவில்லை. கல்லூரியிலிருந்து வரும் போது தவற விட்டிருக்க வேண்டும். நூல்களை மீண்டும் அள்ளி மேஜையின் மீது குவித்த பின், வீட்டிலிருந்த மற்றொரு பேனாவை எடுத்து கைகளுக்குள் உருட்டிக் கொண்டிருந்தவன் அதைத் தரையில் வீசினான்.

வீட்டில் திருமண வரவேற்பிற்கு சென்றிருக்கிறார்கள், வர எட்டாகி விடும், ஒரு மணி நேரம் உள்ளது. மீண்டும் மேஜையைக் கலைத்துத் தேடினான், இன்னும் இருபது நிமிடங்கள் தான் உள்ளன. நாடார் கடைக்குச் சென்றான். ‘பால் பாய்ன்ட்
பென் தாங்க நாடார்’,

‘அது இல்ல, ரோட்டோமாக்’, ‘அந்த கலர் இல்ல, அதுக்கடுத்து இருக்கறது, ஆமா அதான் ரோஸ் கலர்’. வீட்டிற்கு வந்தவன் தன் அறையில் ட்யூப்லைட்டை அணைத்து விட்டு, மெல்லிய வயலட் ஒளி வீசும் இரவு விளக்கை இயக்கிய பின், பேனாவை தன் முகத்தின் எதிரே கொண்டு வந்தான். நளினமான பிங்க்/ரோஸ் நிற பிளாஸ்டிக் பேனாவின், கிரேக்க நாட்டு வீரர்கள் அணியும் தலைப்பாகை போன்ற, சற்றே வளைந்த அதன் மேலுறையினுள் ஊடுருவிய வயலட் ஒளியுடன் முயங்கிய ரீபில்லின் நீல நிறம் பிங்க் நிறத்துடன் மோதி வேறொரு வர்ணத்தை அடைகிறது.

மேலுறை, ரீபில். ஆடை, உடல். முதலில் பேனாவின் மேற்பகுதியை சுவைத்து, பின் அதை இடது கையில் செங்குத்தாகப் பிடித்தபடி மேலிருந்து கீழ் வரை உதடுகளால் வருடினான். பின் கிடைநிலையாகப் பிடித்தபடி மீண்டும் வருடியபடி, வலது கையை அடிவயிற்றுப் பக்கம் கொண்டு சென்ற சிறிது நேரத்திற்குப் பின் உடல் விதிர்த்து அடங்கியது. பேனாவை முகர்ந்த போது நாசியை தீண்டிய எச்சில் வாசம் மீண்டும் கிளர்த்தியது. மீண்டும் வலது கையை அடிவயிற்றுப் பக்கம் கொண்டு சென்று நிறுத்தினான், உடலில் வலுவில்லை. இடது கையை தரையில் ஊன்றிக் கொண்டு எழுந்து கையை கழுவ குளியலறைக்குச் சென்றான்.

oOo
“All human activity that does not contribute, even indirectly, to
testicular and ovarian arousal, to the meeting of sperm and egg, is
contemptible. For instance, the selling of insurance, to which you
and I have devoted the past thirty years, or misogynistic Rotary
luncheons”

விளக்கணைத்தாயிற்று. கட்டிலில் மூவருக்கு இடமில்லை என்பதால் மனைவியும் நான்கு வயது மகனும் தரையில் படுக்கிறார்கள். மின்விசிறியின் மூன்று சிறகுகள் பன்மடங்காகப் பெருகியிருப்பதைப் பார்த்தபடி படுத்துக் கொண்டிருந்தான். மகனை எப்போது தனியாக படுக்க வைக்கமுடியும் . படுத்தவுடனேயே தூங்கிவிட முடிகிறது அவர்கள் இருவராலும். மாலை குளித்தாலும் இரவு உறங்குவதற்குள் வியர்த்து விடுகிறது, பின்னங்கழுத்து வியர்வை வாசத்தை உள்ளிழுத்துக் கொண்டான். இன்று மாலை அலுவலகத்திலிருந்து வீட்டிற்கு வரும் போது இவன் தெருவிற்கு முந்தையதில் காளையொன்று பசுவின் மீது நின்றபடி கவிந்திருந்தது. காலுக்கு வைத்துக் கொள்ளும் தலைகாணியை தொடைகளுக்குள் செலுத்தினான். திரைப்படங்களில் பாய்ந்து வரும் ஜல்லிக்கட்டு காளைகள் போன்று பெரிய திமிலெல்லாம் இல்லையென்றாலும், இரண்டு கால்களில் நின்றுகொண்டு முன்னங்கால்களை பசுவின் முதுகின் மீது பரப்பி சாய்ந்திருந்தது மிக கம்பீரமாக இருந்தது.

வலது புறம் புரள்பவனின் தொடை தலைகாணியை அழுத்த ஆரம்பிக்க, தலையை மட்டும் தூக்கி தூங்குபவர்களை எட்டிப் பார்த்து விட்டு குனிந்தான்.

தெருவில் எதுவும் நடந்து கொண்டிருக்காதது போல் மத்திய வயதினர் சென்றுகொண்டிருக்க, இளைஞர்கள் சிரிப்புடன் கடந்து செல்கிறார்கள். அங்கேயே நின்று உற்றுப் பார்த்துக் கொண்டிருக்கும் குழந்தைகள் விரட்டப்படுகிறார்கள். காளையின் கம்பீரத்திற்கு ஒப்புக் கொடுக்கும் பசுவின் உடல். சற்றே எழுந்து, தலையணையை கீழ் பகுதிக்கு கொண்டு சென்று அதன் மீது படுக்கிறான், மற்றொரு தலையணையின் மீது முகத்தை பதித்துக் கொள்கிறான். சிறு வயதில் குடியிருந்த வீட்டின் பின்புறத்தில் இருந்த காலி மனையில் காலை நேரத்தில் கோழிகளை துரத்திச் சென்று ஏறி அமர்ந்து தலையில் சில கணங்கள் கொத்தி விட்டு இறங்கும் சேவல். இப்போதும் அவ்வப்போது காணக்கிடைக்கிற, நின்றபடி புணரும் நாய்கள். காளையை விட விரைவாக முன்னும் பின்னும் சென்று வந்தபடி இருக்கும் ஆண் நாயின் உடலியக்கம். காளையின் நிமிர்வு, விரைத்த நீண்ட குறி. கால்களுக்கடியில் உள்ள தலையணை திமில் போல் புடைக்கிறது. அதை அடக்க இன்னும் வேகமாக இயங்குபவன் முனகலுடன் சரிகிறான்.

oOo
‘A rich, independent mental life demands curiosity, mischief,
fantasy, and unsatisfied desires, which is to say a ‘dirty’ mind,
‘evil thoughts, and the blossoming of forbidden images and appetites
that stimulate exploration of the unknown, renovation of the known,’

சராசரி வாழ்கையை வாழ்ந்து கொண்டிருப்பவனின் பாலியல் பிறழ்கனவுகளின் தொகுப்பான ‘The notebooks of Don Rigoberto’ நாவலின் வரிகளை மீண்டுமொருமுறை படித்தான். பேனா, மாடு இவற்றை வைத்து இவன் எழுதியிருக்கும் இரு குறுங்கதைகள்(அவை கதைகள் தானா?) ரிகோபர்டோ சொல்லும் மறுக்கப்பட்டவையின் ஈர்ப்பின் பாதிப்பால் எழுதப்பட்டவை. அவை வக்கிரம் நிறைந்ததாக தோன்றக்கூடும் , ஆனால் புனைவில் வாழும் ரிகோபெர்டோக்கு மட்டுமல்ல, எல்லோருக்கும் ஒழுக்கம் , நாகரீகம் போன்ற முகமூடிகளைக் களைய வடிகால் தேவை (இந்தக் குறுங்கதைகளைப் பிரசுரத்திற்கு அனுப்பலாமா , அனுப்பினாலும் ஏற்றுக் கொள்ளப்படுமா? ) . மடிக்கணினியை மூடினான். மணி ஒன்பதே கால். எப்போதும் போல், வாசற்கதவு பூட்டப்பட்டுள்ளதையும், கேஸ் ஸ்விட்ச் ஆப் செய்யப்பட்டுள்ளதையும் மனைவி உறுதி செய்து கொண்டிருப்பாள். பின் மகனின் அறைக்குச் சென்று சில நிமிடங்கள் பேசிவிட்டுத் தான் வருவாள்.

ஜன்னலருகே சென்று வெளியே பார்த்தான். அமாவாசைக்கு மூன்று நாள் அடுத்து, மிகவும் மெலிந்த அரைவட்ட நிலவு இரவின் இடுப்பில் மெல்லிய ஒட்டியாணம் போல். எப்போது வேண்டுமானாலும் கழன்று வானிலிருந்து விழக்கூடும். அப்படி நடந்தால் அதைத் தொடர்ந்து மேக ஆடையும் அவிழ்ந்து நிர்வாணமாக இரவு வானம். சே, சிறிதும் எராடிக் தன்மை இல்லாத கற்பனை, ‘லிட்ரரி ரெவ்யு’ வழங்குவது போல், தமிழிலும் ‘மோசமான பாலியல் எழுத்து’ விருது இருந்தால் கண்டிப்பாக தேர்வு செய்யப்படும்.

தொலைவில் விண்ணை நோக்கி நீண்டிருக்கும் அலைபேசி கோபுரத்தைப் பார்த்துக் கொண்டிருந்தான். விண்ணைப் பிளக்கும் குறி. கோபுரத்தின் உச்சியிலிருந்து மினுங்கியபடி உமிழப்படும் சிவப்பொளியின் சில கீற்றுக்கள் இரவினுள் சிந்தி நட்சத்திரங்கள் பூக்கக் கூடும். உள்ளங்கைகளில் இறுகும் ஜன்னல் கம்பிகளில் பற்களை பதித்தான். பெயிண்ட்டும் இரும்பும் கலந்த சுவை நாவில். சென்ற வார இறுதியில் குடும்பத்துடன் சென்றிருந்த கோவிலில் பார்த்த, மூலவரின் மடியில் கால் மடித்து அமர்ந்திருந்த உமையின் சிறிய வெண்கல முலைகள். தொண்டையிலிருந்த எச்சிலை மேலெழுப்பி கம்பியின் மீது தேய்க்க அதில் இரு சிறு புடைப்புக்கள் தோன்றி உதடுகளை உரசின. இளகும் கம்பிகளினால் உள்ளிழுத்துக் கொள்ளப்படும் உதடுகளை ஊடுருவும் யோனி சுரப்பின் சுவை . திரைச்சீலையால் ஜன்னலை மூடிவிட்டு படுக்கைக்கு வந்தான். அமேசானிலிருந்து தருவித்து அன்று தான் வந்திருந்த மிக மிருதுவான, உறை போடப்படாத வெள்ளை நிற ரெக்ரான் தலையணையில் இன்னும் மிச்சமிருக்கும் புது வாசம். உடனே உறங்கிவிட்டான்.

குறிச்சொற்கள்
மேலும் வாசிக்க

தொடர்புடைய பதிவுகள்

Leave a Reply

Your email address will not be published. Required fields are marked *

மேலும் படிக்க

Close
Back to top button
Close